Даниел Крег и Том Брејди воодушевени од враќањето на Астон Мартин во Формула 1! [ФОТО]

По повеќе од 60 години, Астон Мартин се враќа во Формула 1, презентирајќи го новиот болид АМР21, со кој во новата сезона ќе управуваат Себастијан Фетел и Ленс Строл.

Тимот, порано познат како Расинг Поинт, беше преименуван во текот на зимата, откако сопственикот Лоренс Строл ја презеде контролата врз бизнисот на Астон Мартин. Новиот тим сега се вика Aston Martin Cognizant F1 Team, со што Aston Martin е тим во Формула 1 за прв пат од 1960 година.

Со посебен интерес се чекаше на претставувањето на болидот на овој тим, а сега е откриено дека во болидот доминира бојата „британско тркачко зелено“, но некои розови детали се задржани.

Тимот беше поддржан од актерот Даниел Крег, но и од легендарниот американски фудбалер Том Брејди.

„Сакам да му честитам на Астон Мартин за враќањето во Ф1 за прв пат од 1960 година. За мене е неверојатна возбуда, и сигурен сум за сите љубители на Ф1, да го видат Астон Мартин повторно како се натпреварува во својот култен Астон Мартин Расинг Грин“, изјави актерот Даниел Крег, кој го игра британскиот таен агент Џејмс Бонд, кој често вози Aston Martin.

Презентацијата на новиот автомобил ја водеше актерката Џема Артертон, една од девојките на Бонд.

Астон Мартин беше поддржан и од легендарниот Том Брејди.

„Еј Ленс и Себ, ќе навивам за вас на секој чекор“, рече Брејди.

Сопственикот на тимот Лоренс Строл објави дека има големи планови.

„Мојот прв сон беше да имам тим во Формула 1. Вториот сон беше да се здобијам со значителен удел во Астон Мартин Лагонда. Денес, станува збор за спојување на тие два соништа, но ова е само почеток. Нашите амбиции се неограничени. „Сега имаме на располагање делови, луѓе и партнери, за да можеме вистински да напредуваме“, рече Строл.