Легендарниот Туполев Ту-154 го оствари својот последен комерцијален лет!

Легендарниот Туполев Ту-154, водечки авион на советската цивилна авијација, го направи својот последен комерцијален лет во средата, по кариера долга скоро 50 години, објави авиокомпанијата Алроза.

„За жал, најавуваме крај на работата на единствениот Ту-154 што беше дел од руската цивилна авијација“, стои во соопштението на „Алроза“, чија сопственост е истоимената рударска компанија.

Последниот комерцијален лет на Ту-154, со 140 патници, е извршен помеѓу градот Мирни (Далечен Исток), познат како „дијамантски главен град“ и Новосибирск, во западниот дел на Сибир, според авиокомпанијата.

„Цела епоха на национално производство на авиони заминува со овој легендарен авион“, додава Алроза, кој објави видео од последното слетување на авионот на социјалната мрежа VK со порака „Благодарам Ту-154..“.

Авионот Ту-154, препознатлив по опашката во форма на Т, ќе продолжи да се користи од Министерството за одбрана и Министерството за вонредни ситуации.

Дизајниран во времето на Советскиот Сојуз, Ту-154 го направи својот прв лет во 1968 година, а се користи од 1972 година. Долго време, тоа беше главниот авион на руската национална компанија Аерофлот, имаше повеќе од илјада авиони, но поради прекумерната потрошувачка на гориво, постепено беше „пензиониран“ на почетокот на 2000-тите.

Производството на овој авион постепено се намалуваше во средината на 90-тите години на минатиот век, а целосно беше прекинато во 2013 година.

Туполев Ту-154 имал голем број несреќи – 73, во кои загинале 2.911 лица, според здружението специјализирано за воздушни несреќи АСН (Мрежа за безбедност на воздухопловството).