Надал лесно стигна до дуелот со Ван де Зандшулп

Рафаел Надал се пласираше во третото коло на Ролан Гарос со победа против домашниот тенисер Корентин Моте во три сета. Шпанецот за минута над два часа на теренот славеше со резултат 6:3, 6:1, 6:4.

Првиот сет Надал го освои практично во вториот гем кога стигна до единствениот брејк во овој дел од дуелот. Шпанецот не дозволи никакво изненадување, но Моте успеа да спаси една сет топка.

Во вториот сет Надал е уште подоминантен. Многу брзо беше 4:0 на петтиот носител кој имаше два брејка предност. Моте успеа да стигне до еден гем пред да претрпи нов брејк во последниот гем од сетот. И овој пат, ако има некаква утеха за него, спаси една сет топка.

Третиот сет започна поинаку – со брејк што го направи Моте во првиот гем од овој дел од мечот. Надал не требаше долго да се врати и да израмни на 2:2, па во продолжение направи дополнителен брејк за водство од 5:3 и се чинеше дека овој меч е веќе завршен. Моте не мислеше така и успеа да го врати брејкот во играта во која Надал сервираше за победа.

Сепак, Моте го продолжи мечот само за еден гем бидејќи Надал со нов брејк дојде до победата.

Ботиќ ван де Зандшулп ќе му биде ривал на Надал во третото коло.