Секоја втора личност во светот изгуби дел од приходите за време на пандемијата

Приходите на секоја втора личност во светот се намалија поради пандемијата предизвикана од коронавирус, а луѓето во посиромашните земји беа особено погодени од загуба на работното место или скратување на работното време, покажа студија објавена во понеделникот.

Американската компанија за истражување на јавното мислење Gallup, која анкетираше 300.000 луѓе од 117 земји, откри дека половина од оние кои имаат работа заработиле помалку заради пандемијата ковид-19. Тоа значи дека 1,6 милијарди возрасни се погодени ширум светот.

„Во светски рамки, овие проценти се движеа од високи 76 проценти во Тајланд до ниски десет проценти во Швајцарија“, се вели во соопштението на Gallup.

Во Боливија, Мјанмар, Кенија, Уганда, Индонезија, Хондурас и Еквадор, повеќе од 70 проценти од анкетираните рекле дека внесуваат помалку во куќата отколку пред светската здравствена криза. Во Соединетите држави, таа бројка беше 34 проценти.

Кризата „ковид19“ ги погоди работниците ширум светот, особено жените, кои се презастапени во ниско платените и несигурни сектори како што се малопродажбата, туризмот и услугите за храна.

Студија на меѓународната добротворна организација „Oxfam“ во четвртокот покажа дека пандемијата ги чинеше жените ширум светот изгубени приходи од 800 милијарди долари.

Анкета на Gallup покажа дека повеќе од половина од анкетираните рекле дека привремено престанале да работат на своето работно место или во сопствена компанија – што значи дека биле погодени околу 1,7 милијарди возрасни ширум светот.

Во 57 земји, вклучувајќи ги Индија, Зимбабве, Филипини, Кенија, Бангладеш и Салвадор, повеќе од 65 проценти од испитаниците изјавиле дека престанале да работат некое време.

Земјите во кои луѓето најверојатно ќе речат дека престанале да работат биле претежно развиени земји со високи примања.

Скоро едно од десет лица, кои имале работа во Австрија, Швајцарија и Германија, изјавиле дека привремено престанале да работат. Во САД, бројката е 39 проценти, покажа истражувањето.

Истражувањето исто така откри дека секој трет испитаник изгубил работа или приватен бизнис поради пандемија – што е нешто повеќе од милијарда луѓе на глобално ниво.

Повеќе од 60 проценти од испитаниците останале без работа или приватен бизнис во сиромашните земји, во споредба со 3 проценти во Швајцарија и 13 проценти во САД.